البطاريات ( أنواع - نصائح - شائعات )

أنواع البطاريات 

بتنقسم البطاريات القابلة للشحن لعدة أنواع ومن أهما بطاريات الليثيوم المستخدمة حاليا بأغلب الأجهزة يلي منتعامل معا بشكل يومي ومن أهم أنواع بطاريات الليثيوم هي الليثيوم ايون والليثيوم بوليمير والي رح نحكي عنن اليوم ومنبدا بالليثيوم ايون ..

• Lithium-ion 

هي عبارة عن بطارية قابلة للشحن وبتتكون من قطب موجب من الليثيوم وهو عبارة عن مادة نشطة كيميائيا .. وقطب سالب من الكربون وبتستخدم خليط من الكربونات العضوية و أيونات الليثيوم المنشورية لتشكيل الـ electrolyte

• Lithium-Polymer

وبتتكون من قطب موجب من أكسيد الليثيوم المعدني وقطب سالب من الغرافيت وبتحتوي على مزيج ليثيوم مبلمر لتكوين الـ electrolyte وبتكون على شكل رقائق أو جل

• حياة البطارية : (Battery Life)

وهي فترة التفريغ اي ما بين الشحن الكامل وصولا لحد التفريغ الكامل

• عمر البطارية : (Battery Lifespan)

وهو عمر البطارية الإفتراضي أو المرحلة يلي بتحتاج فيا تغيير البطارية وبتتراوح بين 600 و 1200 دورة شحن كاملة

• دورة الشحن : (Charge Cycle)

وهي عكس فترة حياة البطارية .. اي انو هي الفترة يلي بتحتاجا البطارية للشحن من صفر لـ 100٪
وبتمر دورة الشحن الكاملة بمرحلتين وهي من صفر لـ 80٪ وتسمى بالشحن السريع ومرحلة من 80 حتى 100٪ وتسمى بالشحن القطري
(في حالة الشحن الجزئي لاتعتبر دورة شحن كاملة)
يعني اذا شحنا البطارية من 50-100٪ تعتبر نصف دورة شحن مع الأخد بعين الإعتبار انو تحويل حالة البطارية من حالة التفريغ الى حالة الشحن أو العكس بتأثر على البطارية بشكل جدا بسيط

نصائح للحفاظ على عمر البطارية :

• الحرارة :

من أكتر العوامل يلي بتأثر على عمر البطارية هي الحرارة وبتعبير اخر .. فينا نقول أنو الحرارة هي العدو اللدود للبطارية ويفضل انو تكون البطارية بدرجة حرارة بين 5-35 درجة مئوية كحد أقصى

عدم تفريغ البطارية بشكل مستمر :
حاول ماتخلي شحن البطارية ينزل عن 20 أو 10٪ كحد أدنى وايقاف الشحن عند الشحن الكامل

ملاحظة : دارة الشحن بتقوم بفصل الطاقة عن البطارية عند اكتمال الشحن ولكن في حالات نادرة جدا ممكن يكون في خلل بالدارة الشي يلي بيأدي لاحتراق البطارية ومنرجع نأكد أنو هي الحالة نادرة الحدوث جدا

• معايرة البطارية :

تفريغ البطارية بالكامل مرة وحدة كل شهر أو شهرين

• ترك البطارية بدون استخدام :

بتتميز بطاريات الليثيوم بقلة تسريب الطاقة مقارنة ببطاريات النيكل القديمة وبتوصل نسبة التسريب بالحد الأقصى لـ 5٪ كل شهر وممكن تكون أقل بالأنواع الجيدة ولكن عند تفريغ البطارية وتركا لفترة طويلة بتأدي لإنخفاض الجهد وخصوصا في حال وجود حمل على البطارية 
(والمقصود هو وجود سحب فولت مستمر حتى في حال ايقاف تشغيل الجهاز)
لذلك ينصح بشحن البطارية بين 40 و 50٪ في حالة التخزين وازالتا من الجهاز في حال كانت قابلة للإزالة

• شحن البطارية بشاحن غير متوافق :

عند الشحن بشواحن ما بتعطي جهد صحيح أو أعلى من الحاجة بتأدي لضرب خلايا البطارية

البحث عن الشبكات :

(الموبايلات والأجهزة المزودة بشرائح إتصال)

البحث الدائم عن الشبكات بيأدي لاستهلاك البطارية بشكل كتير كبير لذلك حاول تخلي الجهاز بمكان بتغطية ممتازة أو تشغيل وضع الطيران (ان امكن) في حال كانت الإشارة عم تروح وتجي بشكل مستمر

بالإضافة لـ تخفيف سطوع الشاشة - ايقاف تطبيقات الخلفية - الاهتزاز - الواي فاي ان امكن - شبكات البيانات ان امكن - البلوتوث في حالة عدم الاستعمال

طلب خاص لبعض البائعين الغير مهنيين :ارجوك …

ما بقا تنصح الناس بشحن البطارية أول مرة لمدة 3 ساعات او 6 او او او ….

بطاريات الليثيوم بتجي جاهزة للإستخدام المباشر وما في داعي ابداً لنشر معلومات غير صحيحة .. وشكراً